مجیدامجدکوسمجھنے کے لئے
لیکن امیدکا ستارہ نہیں چمکتااوریہ نوا،تشنج آمیزبے بسی بن جاتی ہے،لیکن دل ہے کہ مانتانہیں۔اسے ابھی تک انتظارہے۔
وہ دیکھ !شا خیں ہلی ہیں ۔وہ آرہا ہوگا
حسین کلیاں کھلی ہیں ۔وہ آرہا ہوگا
رتیں رتوں سے ملی ہیں۔وہ آرہا ہوگا
یہیں ،ادھرہی،وہ سکھ سنگتی پرانامرا
یہیں پہ رہنے دے صیاد،آشیانہ مرا
کوئی نہ کوئی بہانہ،اس کے قدم روک لیتاہے۔اورشاعرپھرصیادکے سامنے بے بس ہوجاتا ہے۔لیکن کون لوٹ کے آتاہے۔یہاںتک کہ بیساکھ آجاتاہے(یہ ساون رت ہے ۔ اس رت میں پون پودوں کونیاحسن دیتی ہے۔غنچے کھلتے ہیں،کلیاں مسکراتی ہیں) ۔فصلیں کٹتی ہیں۔یہ رت دہقان کے سوئے بخت کی انگڑائیوں کی رت ہے۔بخت بیدارہوتاہے۔دھیمے قہقہے اورشہنائیوں کی گونج سے رستے جاگ اٹھتے ہیں کہ صبحِ جدائی آجاتی ہے۔
ع وہ رات سہانی بیت چکی ،آپہنچی صبحِ جدائی ہے
وصل کے بعدفراق کا لمحہ ،کیوں کہ نظام زندگی اسی سے عبارت ہے۔
جاتاہوں،اجازت !وہ دیکھوغرفے سے شعاعیں جھلکی ہیں
پگھلے ہوئے سونے کی لہریں مینائے شفق سے چھلکی ہیں
غرفے سے شعاعوں کا جھلکنا،مینائے شفق کے بعداسے پگھلے ہوئے سونے کی لہروں سے تشبہیہ دینااورنئی ترکیب بنانا۔کمال فن کی دلیل ہے۔مجیدامجدکی زبان پردسترس اورہر اچھوتے خیال کوآسانی کے ساتھ موزوںالفاظ میں بیان کرنے کا ملکہ حیرت انگیزہے۔یوں مجیدامجد تراکیب کا جہاں معنی آبادکرتاہے۔صبح جدائی کی اصل وجہ تنگ دستی ہے۔اوردنیاکی اندھیری گھاٹی میں ٹھوکریں کھانے کی مجبوری ہے۔
شاہِ وقت کے لئے ایک عام آدمی کی کوئی حیثیت نہیں۔یہیں سے قیصریت کی ایک جھلک نظرآتی ہے۔اس نظم کے بارے میں بلال زبیری کہتے ہیں۔اس زمانے (۱۹۳۴ء)میں اخبارات کے صفحۂ اول پرقومی نظمیں شائع کی جاتی تھیں۔
امجدمرحوم نے عروج کے صفحۂ اول کے لئے نظم لکھی اورکاتب کودے کر لاہور ایک مشاعرہ میں شمولیت کے لئے چلے گئے۔مگرکاتب سے وہ نظم گم ہوگئی ۔کاتب کواحساس تھا کہ نظم کے بغیرپرچہ چھپ گیاتوجواب طلبی ہوگی۔اس نے مجیدامجدکے کاغذات میں سے ایک اورنظم جوباغیانہ قسم کی تھی نکال کرچھاپ دی۔اس کاعنوان قیصریت تھا۔عروج شائع ہوا سرکاری حلقوں میں کہرام مچ گیا۔عروج کے دفترپرچھاپاپڑا۔پولیس نے ریکارڈقبضہ میں لے لیا۔امجد مرحوم کے وارنٹ جاری ہوئے۔یہ حوالہ اس نظم کوواضح کرنے کے لئے بیان کرنا پڑا۔نظم کے تین بندہیں۔سپاہی شاہِ وقت کے فوج کے ساتھ روانہ ہوتاہے۔دوسرابنداس کی موت اوراس کی بیوی کی دوسری شادی پرہے۔بچہ ،سپاہی کا بے یارومددگارلخت جگ، بے در، بے گھرہوجاتاہے۔
تیسرے بندمیں وہی بچہ شاہ ِوقت کے درپربھیک مانگنے گیاہے،لیکن شاہ کی سواری آتی ہے،اوربچہ گھوڑوں کی ٹاپوں تلے رونداجاتاہے۔جب کہ مجبوررعایاکی ہرطرف سے یہ صداآتی ہے۔ بادشاہِ مہربان!زندہ رہے۔یوں یہ نظم ایک طمانچے کی حیثیت رکھتی ہے۔ جس کی بنا پرمجیدامجدکواپنی نوکری سے ہاتھ دھوناپڑے۔"قیدی دوست"بھی قیدیوں کی مجبوری کی داستان ہے۔اورجب ایک قیدخانے سے دوسرے زنداں میں منتقل ہونے کی اطلاع ملتی ہے۔ اسی بہانے سے دو قیدیوں کی ملاقات کا وسیلہ بنتاہے۔یوں:
پھرقدم رکھتے ہی ساحل پرجداہوجائیں گے
ازسرِ نو قیدیٔ دامِ بلاہوجائیں گے
'آوارگان فطرت سے'ہم کلامی ہوتی ہے۔اس نظم کے تین بندہیں ،یہ نظم اپنی بناوٹ (آرٹ اورکرافٹ) کے اعتبارسے بھی اہم ہے۔
ع بتابھی مجھ کوارے ہانپتے ہوئے جھونکے
مجیدامجدکے اسلوب میں ایک خاص چیز،جوخارج سے ہمدردانہ رویہ (Treatment) پیدا کرتی ہے۔وہ مجیدامجدکا رویہ ہے۔جھونکے سے ہمدردی ہے۔اگرچہ وہ سینۂ فطرت کی آہِ آوارہ ہے۔ لیکن مامتاجیسی محبت سے جب سوال ہوتاہے۔توقاری کے دل کوبھی احساسِ محبت سے بھردیتا ہے۔اورسینئہ فطرت کی آہ ِآوارہ کی ترکیب،دل عش عش کراٹھتاہے۔ آہ،جیسے ماں کواپنے بچوں کی ہرحرکت کے بارے میں معلوم ہوتاہے۔اورفوراًبعدایک سوال کہ تیری نظروں نے وہ منظردیکھاہے؟کون سامنظر!؟دنیاکے طول وعرض کے بے شمار مناظرجھونکے کی گردِراہ بنتے رہتے ہیں ۔جب کسی کی یاداشکوں کے ہجوم کے جلومیں ایوانِ دل پرچھاتی ہے۔ اس کے باوجودخرابِ محبت تھک کرنیندکی آغوش میں چلا جاتاہے۔سوال بظاہریہاں ختم ہوگیاہے؟لیکن اصل سوال قاری کے ذہن میں پیداہوچکاہے۔کہ یہ سوال کیوں پوچھاگیا؟تووجہ تھی کہ اس نیندکے عالم میں اس خرابِ محبت پرکیاگزرتی ہے۔لا شعور است کے دل ودماغ پرکیااثر چھوڑتاہے اورنیندمیں اس کا ردعمل کیسا ہوتاہے۔یہاں وہ محبت جورگ رگ میں سما چکی ہے۔اس کی تصدیق کاعمل خودبخودہوجاتاہے۔
بتابھی مجھ کوارے ہانپتے ہوئے جھونکے
ار ے او سینۂ فطرت کی آہِ آوارہ !
تری نظرنے بھی دیکھاکبھی وہ نظارہ:
کہ لے کے اپنے جلومیں ہجوم اشکوں کے
کسی کی یادجب ایوانِ دل پہ چھاجائے
توا ک خرابِ محبت کونیندآجا ئے
یہ آوارہ جھونکا،سداکاپاجی سنی ان سنی کرکے یہ جا وہ جا۔توشاعرابدکنارسمندرکی طرف متوجہ ہوتا ہے۔اورسوال کرتاہے،تری حسیں موجیں جوشب وروز، بھیانک راگ
الاپتی رہتی ہیں۔یہ کیا اور کیوں ہیں؟کیاترے طوفان اس آگ کوبجھانے کا حوصلہ رکھتے ہیں؟،جوکسی دکھ بھرے دل میں بھڑک اٹھتی ہے۔جب جداہونے والوں کی یادماہئ بے آب کردیتی ہے،تو لا شعوری طور پرایک ہی نام نکلتاہے۔لیکن سمندراپنے آپ میں گم ،چپ رہتاہے۔توروح سے اک ہوک اٹھتی ہے۔
جب ایک بچھڑے ہوئے کا پیام آتاہے
کسی کا روح کے ہونٹوں پہ نام آتاہے
مندرجہ بالا بندمیں "بھیانک راگ "کی ترکیب کے بعد،روح کے ہونٹ کی پیکر تراشی مجیدامجدکے فن کاحصہ ہے۔ہنوزسوال شرمندہ جواب ہے۔شاعرچاندکے حسن کی طرف متوجہ ہوتا ہے۔چاندحسیں رتوں اورحسیں چہروں کا مرکزومحور،ویرانے ، آبادی، صحرا،سمندر،پہاڑاور میدان اوروادیوں کے آنگن میں اترکر،ان کہے اوران سنے رازوں کاامیں کچھ توہی بتا۔کیا تری کرنوں کے نیلگوں سائے کبھی ایسے شہرِخموشاں میں لہرائے ، جہاں ایک بیوہ کسی قبرپرچراغ جلا کرایسی کرب آمیز خاموشی سے تڑپی ہوکہ سونے والا بے دارہوکربے چین ،بے کل ہوگیاہو۔ مجیدامجد کااندازد یکھے۔
جہاں پہ ایک ابھاگن نے جب جلا کے چراغ
کسی قبرپہ مدھم سی روشنی کی ہو!
توسونے والے نے بھی جاگ کرصدادی ہو
لیکن سامنے سکوت صحراتھا۔کرب کی حدت تھی ۔مجیدامجدنے اس نظم میں زندگی کوبیوہ کے روپ میں دیکھاہے۔چندلمحے وادیٔ خیال میں،خیال بھٹک گیااورمحبوب کے کانوں میں بندا نظرپڑا،تودل شاعرنے مچل کرصدادی۔
کاش میں تیرے بن گوش میں بنداہوتا!
لیکن یہ خودفریبی زیادہ دیرقائم نہیں رہتی۔'گراس جہاں میں جیناہے'۔جیسی باتوں سے پالا پڑتاہے۔یہ نظم ایک بھرپورطنزہے۔وہ لوگ جودنیامیں زندہ رہنے کے لئے ہرچیزکوداﺅ پرلگا دیتے ہیں۔اس لئے شاعرکہتاہے کہ اگراس جہاں میں جیناہے توضمیرکوبیچ دے۔پھرکسی مشکل میں پڑے بغیرزندگی گزاردے۔اکبرکا پورپی تہذیب وتمدن پربھرپور طنزاوراقبال کا نظریہ خودی سامنے آنے کے بعدبھی لوگ مغربی تہذیب کی طرف جھکے جاتے تھے۔اس لئے مجیدامجد نے ایک اورطنزکا نشترچلایا۔
ہے ترے دل میں جوچنگاری ،اس کانام نہ لے
خودی کارتبۂ خودداری!اس کانام نہ لے
شاعرکادل دکھی ہے۔اس نے بڑی مشکل سے اپنے اشکوں کوروکاہواہے۔اتنے میں گھنگھورگھٹائیں کہیں سے گھرکے آجاتی ہیں توگھٹا سے ہم کلام ہوتاہے۔
تواپنے ساتھ ہی لے چل یہاں سے جاتے ہوئے
کھلونے اپنی پھواروں کے جھنجھناتے ہوئے
کیوں کہ شاعرکومعلوم ہے اس خوب صورت منظرمیں اسے دوست یادآئیں گے۔ کسی کے پیکرکے خطوط تڑپائیں گے۔اپنی بے بسی اورمعذوری کا احساس شدت سے ہوگا،اس لئے اسے کس قدرسختی اوربرہمی سے کہتاہے۔
میں سن چکا ہوں بہت تیری داستانیں،بس
خموش!مجھ کونہیں راس ترے نغموں کا رس!
شاعرِبے نشان ،پابہ گل کے لہجے میں یہ تبدیلی کیوں آئی۔وجہ سامنے ہے کہ اب تک کی شکست وریخت نے نئے خواب وخیال اورسپنوں میں اسیر ہونے سے انکارکردیا ہے ۔اورآخر شاعربے بسی سے شاعرپکاراٹھتاہے۔
نہ چھیڑآج یہ اپنی رسیلی شہنائی
ہے مشکلوں سے مرے آنسوؤں کونیندآئی
یوں پہلی بارشاعردل محزوں کے ہاتھوں پریشان ہوتاہے اورایک نوا،ٹوٹے ہوئے دل سے نکلتی ہے،کہ میں نے مشکل سے آنسوؤں کوسنبھالاہے۔اگرتونے،اے گھٹا اپنے فریبِ حسن کے جال نہ سمیٹے تو،بات بڑھ جائے گی،دل مچل جائے گا،میرے بے تاب آنسوچھلک جائیں گے۔ابھی شاعرگھٹاسے مکالمہ کررہا تھا کہ "ایک اچھوت ماںکا تصورِخدا"اسے پریشان کردیتا ہے۔ امیروں نے خداکوبھی دھوکادے رکھاہے اوربے کس غریب ماں اپنے ننھے بالک سے کہتی ہے کہ:
کہاں رہتاہے پرمیشر؟ادھرآکاش کے پیچھے کہیں دور،اس طرف تاروں کی بکھری تاش کے پیچھے!
اوردنیاوالے اس کے ساتھ کیاسلوک کرتے ہیں۔یہ اس کواپنی لا شیں،اپنے مردے سونپ دیتے ہیں۔لیکن بھگوان بھگوان کی رٹ لگانے والوں کاظاہرباطن ایک نہیں ہے۔
ع یہ اس بھگوان کے دامن کوچھولینے سے ڈرتے ہیں
اورنہ ہی کسی اورکواس کے قریب جانے دیناچاہتے ہیں۔بھگوان پربھی اپنااجاراجما رکھاہے۔ اوراگرکوئی اس کا بھجن گائے انہیں پسندنہیں ہے۔اورآخرمیں
ع میرے بھولے !ہماری اوراس کی ایک لیکھا ہے کہہ کربات ہی ختم کردی ہے کہان لوگوں نے اس کا نام صرف جپنے کے لئے رکھا ہوا ہے ورنہ اس کی اورہماری قسمت ایک ہی ہے۔
"لیکن گل کا چراغ"اس مایوسی کے عالم میں چراغ کوئے حبیب ،بن جاتاہے۔اورایک اہم سنگ میل بھی۔
جوتونہ ہوتویہ رازاک فسانہ بن جائے
نگا ہِ ا ہلِ جہا ں کا نشا نہ بن جائے
ایسے میں بیاہی ہوئی سہیلی کا خط آتاہے۔یوں شاعرایک سہیلی کے جذبات دوسری سہیلی تک پہنچاتاہے۔یہ نظم بھی اپنی نوعیت کے منفردجذبات کا اظہارہے۔جب اس کی پسندکے بغیر اس کی شادی ہوجاتی ہے۔لیکن "پژمردہ پتیاں"صحن میں بکھری نظرآتی ہیں۔شاعرکہتاہے،
پریشان نہ ہویہ پتیاں بکھری ہوئی نہیں ہیں بل کہ:
ع پیوندہیں خزاں کے کفن میں لگے ہوئے
بکھری ہوئی پتیوں کوخزاں کے کفن میں لگے پیوندسے تشبہیہ دی گئی ہے۔کیوں کہ یہ "صرف خزاں بھی ہوکے نقیبِ بہارہیں"جان کا نذرانہ دے کربہارکی خوش خبری دیتی ہیں۔لیکن انتظارکی شدت،حوصلے کی تنہائیوں کوعجب اندازمیں توڑنے کی طاقت رکھتی ہے۔ نقیبِ بہارسے پہلے صرفِ خزاں ہونے کا عمل انہیں بے چین کردیتاہے۔اورسوال پیدا ہوتا ہے۔یہ واقعہ ' کہاں' ہوا؟موت کی گفت گوسنناچاہتاہے۔زندگی کا محدودعلم اسے بے کل کردیتا۔اورکہتاہے سانس کی روانی ہی کی وجہ سے جیون کی رت سہانی ہے۔کیوں کہ وہ ہراس بات کوقبول نہیں کرناچاہتاجس کے بارے میں اسے یقین نہ ہو۔
کس نشیمن میں کس ٹھکانے کہاں ۔؟
اپنی منزل ہوپھرنہ جانے کہاں۔؟
لیکن عقدۂ ہستی کارازاس پرکھلتا ہے۔اورشاعرایک ریل کے مسافرکے تأثرات سے بات سمجھانے کی کوشش کرتاہے۔کہ دیکھو یہ ریل گاڑی چلی جا رہی ہے۔دشت میں اک لالہ کھلا ہواہے۔اک طرف کملائی دوب ،دوسری طرف سوکھاببول ہے۔
لیکن لالہ کے حسن میں کوئی کمی نہیں آئی۔لہٰذاعقدئہ ہستی کارازکوئی نہیں جانتا،یہاں توبس۔
عقدئہ ہستی کوسلجھایاہے کس نے اورکب ؟
آہ اس دنیامیں دل روتے ہیں اورہنستے ہیں لب!
اوریوں اس جہانِ رنگ وبوسے رخصت چاہتاہے۔کیوں کہ
"آہ میری روح کوڈسنے لگی ہے سانس سانس"
اس طرح شاعرپر"دنیا"کی حقیقت واضح ہوچکی ہے۔وجہ:
یہی پھول کی زیست کاماحصل ہے
کہ اس کاتبسّم ہی اس کی اجل ہے
نہ کلی چٹکتی ،نہ پھول مسکراتا،نہ اس کا چہرہ تبسم آشناہوتا،نہ اجل اس پرلازم آتی ۔ لیکن تبسم آشناہونے کے بعدوہ رازِحیات کوجان گیاتھی(تھا)۔اس لئے اس پرتعزیرِاجل لازم ہوگئی تھی۔ کیوں کہ جہاں کی حقیقت کیاہے؟فریبِ نظرتھی،فریبِ نظرہے۔جب پھول کومعلوم ہواکہ یہ دنیاایک دھوکاہے،تواس کا نرم ونازک دل اس شدتِ غم کوبرداشت نہ کرسکا،اوراجل کے ہاتھوںپتی پتی ہوکربکھرگیا۔یہ انجام توگل کاہوا۔دھیان میں آیا۔ سرمگین آنکھوں کاکیاہوگا ؟ جواب سنئے۔
نہ سمجھوکہ چشمِ حسیں سرمگیں ہے
نہیں قبرکی تیرگی کی امیں ہے
یوں دنیاکی حقیقت اس پرواضح ہوجاتی ہے،اب کوئی شبہ نہیں رہانتیجتاًوہ کہہ اٹھتاہے۔
یہ دنیاہے میری کہ مرقدہے میرا
یہاں بھی اندھیراوہاں بھی اندھیرا
اس قدرمایوسیوں اورپابندیوں سے تنگ آکرخودکشی کا خیال پیداہوتاہے۔کہ کیوں نہ
ع سنگِ اجل پہ پھوڑدیں اس جامِ زیست کو
لیکن وہ دیکھتاہے اس دنیامیں وہ اکیلا مسافرتو نہیں ہے۔دنیاکی ہرشے مسافرہے۔ توپھرشومئ قسمت کا گلا کیوں ؟لیکن 'سنگِ اجل' اور'جامِ زیست' کی تراکیب اک نیاذائقہ رکھتی ہیں۔ اس لئے سازفقیرانہ چھیڑنے کوجی چاہتاہے۔یوں لمحۂ موجودسے زیست کشید کرنے کاحوصلہ پیدا ہوتاہے۔اوردنیاکی بے بضاعتی ظاہرہوتی ہے۔
بساطِ سیل پہ قصرِحباب کی تعمیر
یہ زندگی ہے توپھرہوناکیا،نہ ہوناکیا
اگرزندگی کی یہی تعبیرہے۔کہ بہتے ہوئے پانی پرحبابوں کے محل تعمیرکئے
جائیں۔تو ہونے،نہ ہونے سے کچھ فرق نہیں پڑتااوراب ذرا"بساطِ سیل پہ قصرِحباب کی تعمیر"کا ٹکڑادیکھئے، کیسی نادرترکیب وضع کی ہے۔یوں زندگی کی حقیقت معلوم ہونے کے بعد"سفرحیات"کا طول دل کو کھانے لگتاہے۔دل سے اک کراہ اٹھتی ہے۔'یہ رستہ کہاں ختم ہوگا،نہ جانے؟'مختلف مناظر نظروں کے سا منے سے گزرتے ہیں ،ایک منظرآپ بھی دیکھئے۔
نگاہوں کے آگے اجل کی سیاہی
کرے کیا بچارا تھکا ہاراراہی
چلاتوہے تقدیرکوآزمانے
یہ رستہ کہاں ختم ہوگا،نہ جانے؟
اک طرف زندگی کی یہ صورت،دوسری طرف ،چچی کے لب ِدشنام طرازواہوتے ہیں کیوں کہ
جس کی ماں پھرلوٹ کے فردوس سے آئی نہ ہو
وہ ابھاگن !جس بچاری کاکوئی بھائی نہ ہو
اورباپ کوسوں دورکسی کارخانے میں مزدورہو،اس دکھیاکے لئے جیناوبال ہوجاتا ہے۔اب تک مجیدامجدنے صرف پابندنظمیں کہی ہیں۔اورصرف ایک غزل کہی ہے۔یہ ۱۹۴۰ء ہے۔ماحول پرفیض،راشداورمیراجی کا فسوں طاری ہوتاجا رہاہے۔اقبال راہی ملک عدم ہوچکے ہیں۔اخترشیرانی کی رومانیت اپنے پنجے گاڑھ چکی ہے۔ترقی پسندمصنفین کا غلغلہ ہے۔ادبی دنیا ایک ہیجان سے دوچارہے۔جدیدوقدیم دست وگریباں ہیں۔
لیکن آپ نے دیکھا۔مجیدامجداپنے آپ میں مگن ،اپنی ہی رومیں مسلسل آگے بڑھتاجارہا ہے۔بیسیوں نادرتراکیب،مصرعے اوراشعارکہہ چکاہے۔جونیا ذائقہ رکھتے ہیں۔ کئی نظمیں چونکا دینے کی صلاحیت رکھتی ہیں۔
۱۹۴۱ءمیں پہلی نظمِ معری مجیدامجدکے قلم سے نکلتی ہے۔اوریہ نظم مجیدامجدکے بنیادی فن کی تمام خوبیوں کی مظہرہے۔پہلی مکمل نظم جہاں مجیدامجداپنی شاعری کوبامِ عروج پرپہنچادیتاہے۔ نظم کا نام ہے"کنواں "اب تک کے مطالعے سے معلوم ہوتاہے کہ مجیدامجد کی شاعری فکروفن کی سطح پراپنی حیثیت منواچکی ہے اوروہ توانائی حاصل کرچکی ہے۔جوکسی بھی منظراوراحساس کے بیان کرنے میں کامل گرفت رکھتی ہے۔نہ صرف منظراوراحساس کومجسم کرنے کا حوصلہ رکھتی ہے بلکہ حسیاتی ،نامیاتی سطح پرایسانقش ابھرتاہے کہ منظربولتا ہے۔احساس زیست کی طرح ہمکتاہے۔ جیسے زندگی میں دل دھڑکتاہے۔نظم کنواں کا پہلا بنددیکھئے۔
کنواں چل رہا ہے!مگرکھیت سوکھے پڑے ہیں نہ فصلیں،نہ خرمن،نہ دانہ،
نہ شاخوں کی باہیں،نہ پھولوںکے مکھڑے ،نہ کلیوں کے ماتھے،نہ رت کی جوانی
گزرتاہے کیاروں کے پیاسے کناروں کویوں چیرتا۔تیز،خوں رنگ،پانی
کہ جس طرح زخموں کی دکھتی تپکتی تہوں میں کسی نیشترکی روانی
ادھردھیری دھیری
کنویں کی نفیری
ہے چھیڑے چلی جا رہی اک ترانہ
پراسرارگانا
یہ نظم بے شمارسوالات کوجنم دیتی ہے۔شاعرتوصرف حقیقت بیان کرنے کا سزاوارہے اور سوالات خودبخودذہن میں ابھرنے لگتے ہیں۔مجیدامجدفن کی باریکیوں کونظرمیں رکھتا ہے۔ کوئی الزام اپنے سرنہیں لیتا،وہ خالصتا ًشاعرہے۔کنواں چل رہا ہے۔لیکن پانی کہاں جا رہا ہے؟ کیا کھیتوں کوسیراب کررہا ہے!؟اگرکھیت سیراب ہورہے ہیں توسوکھے کیوں ہیں؟فصلیں کیوں نہیں لہلہاتیں؟اوربالی دانوں سے تہی کیوں ہے؟شاخیں باہیں کیوں نہیں بن پاتیں؟ شاخوں پرپتے کیوں نہیں آتے (باہیں بنناسہارادینااورمددگارکے معنوں میں استعمال ہوتا ہے)؟ایک مسلسل عمل ہے۔شاخیں ننگی کیوں ہیں؟رت جواں کیوں نہیں ہوتی؟کلیاں کیوں نہیں کھلتیں؟ پھول کیوں نہیں مسکراتے؟پھولوں کی طرح مسکراتے شاداب چہروں کوکیاہوا ہے؟ اوریہ پانی جو پیاسے کناروں تک پہنچ گیاہے۔انہیں چیرتا کیوں ہے؟اوراس میں تیزی اورخوں کا رنگ کیوں آ گیاہے؟یہ زخموں پرمرہم رکھنے کی بجائے نشترکیوں بن چکاہے؟یہ پانی توزندگی آمیز تھا،قاتل کیوں کرہو؟یہ آلہ قتل سے کیسے بدل گیا؟کیا یہ دشمنوں سے مل گیاہے؟کیوں کہ کنواں چل رہا ہے؟کنویں کی نفیری ،وہ سریلی آواز، جو کنویں کے چلنے کا اعلان ہے،آرہی ہے۔جوسانسوں کے زیروبم سے ملتی جلتی ہے۔یہ توزندگی آمیزسریلی نفیری تھی ۔توکیااس میں بھی کوئی چا لاکی ہے؟
اس کے ترانے پراسرارکیوںہوگئے ہیں؟سر، سحرزدہ کیوںہیں؟گیت طلسم آلودکیسے ہوگئے؟توکیاکسی سا مری کے نغمے ہیں؟جوروح کوجلا دینے کی بجائے اعصاب کو شل کررہے ہیں۔ کنواں چل رہا ہے!یہ پانی اورپانی کا عمل عجیب الجھن پیداکرچکا ہے!اس کنویں کی نفیری میں کیاجادوہے؟یہ پراسرارآوازاپنے اندرکیااثررکھتی ہے؟کہ ماحول کی ہر شے آسیب زدہ لگتی ہے۔ بس اس آوازکوسن کرایک نیم جاں،اندھا (آنکھوں پرکھوپے) تھکا ہاربیلوں کاجوڑا،زنجیروں میں جکڑاہوا،بھاری سلاسل اٹھائے ہوئے ،آتشیں تازیانوں کوسہتاہوا،مسلسل چل رہا ہے۔قضا نے یہ کیا جال بچھارکھاہے؟کہ بے چارے بے بس بیل، شانوں سے شانے ملائے،نہ چاہتے ہوئے بھی چل رہے ہیں۔
انہیں اپنی منزل کی خبرنہیں،نہ ہی وہ انجام کوجانتے ہیں،رکنے کی طاقت نہیں کہ پھرایک تازیانہ پیٹھ پرسہناہوگا،چلنے کاحوصلہ نہیں کہ اب قدموں میں سکت باقی نہیں رہی۔ قسمت کے کھیل بھی عجیب ہیں۔کہ بیل ایک ایسے طویل اورلا منتہی راستے پرچل رہے ہیں۔ جوعدم کی طرف جاتاہے۔طاقتیں شل ہیں اورایک کل کی طرح بے کلی انہیں مقدر آزمانے پر اکسائے جا رہی ہے۔ ایک لمحے کورکیے،آپ نے مجیدامجدکے فن کاجادومحسوس کیا۔کہ کس طرح احساس کوخیال کی سطح سے گزارکرجیتی جاگتی اورہمکتی،للکتی دنیابنادیا ہے۔احساس کودھڑکن ،خیال کو مجسم اورتصورکوتصویر کرنے کا فن،وجدانی حدوں کوچھوتاہوامحسوس ہوتاہے۔
کنویں والا ،گادی پہ لیٹاہے،مست اپنی ہی بنسی کی میٹھی سریلی صدامیں
کہیں کھیت سوکھا پڑارہ گیااورنہ اس تک کبھی آئی پانی کی باری
کہیں بہہ گئی ایک ہی تندریلے کی 'فیاض'لہروں میں کیاری کی کیاری
کہیں ہوگئیں دھول میں دھول لاکھوں،رنگا رنگ فصلیں ،ثمردارساری
پریشاں پریشاں
گریزاں گریزاں
تڑپتی ہیں خوشبوئیں دامِ ہوامیں
نظامِ فنامیں
دوسرامنظردیکھئے کنویں والا،گادی پرلیٹاہواہے۔بانسری بجارہا ہے۔اوراپنی ہی بانسری کی سریلی صدامیں مست ہے۔اسے اس بات کی فکربھی نہیں اورنہ ہی خبرہے کہ کوئی کھیت سوکھاتونہیں رہ گیا،یاکسی کھیت تک پانی کی ایک بوندبھی نہیں پہنچ پائی۔اورکوئی کھیت لہروں کی فیاضی کی وجہ سے عدم آبادکا حصہ بن گیاہے۔فصلیں رزق خاک ہوگئی ہیں، خوشبوئیں جوحرفِ آرزوتھیں۔جوحسنِ آگہی تھیں،دامِ ہوانے ،یانظامِ فنانے،انہیں ہڑپ کرلیا ہے۔ یہ فضا آلودہ کیسے ہوئی؟فصلوں کی سوندھی سوندھی بھینی خوشبوئیں دامِ ہواسے برسرپیکار ہوئیں اوراس تگ ودو کا کوئی سرانہیں ملتا۔کہ کیا ہوا؟کیاہواہوگا؟کیا ہوسکتاہے!؟یہ کنواں چل رہا ہے یا دیدوں کا پانی ڈھل رہاہے آگے چلنے سے پہلے آخری بنددیکھئے۔
اوراک نغمۂ سرمدی کان میں آرہا ہے،مسلسل کنواں چل رہا ہے
پیاپے مگرنرم رواس کی رفتار،پیہم مگربے تکا ں اس کی گردش
عدم سے ازل تک،ازل سے ابدتک بدلتی نہیں ایک آن اس کی گردش
نہ جانے لئے اپنے دولاب کی آستینوں میں کتنے جہاں اس کی گردش
رواں ہے،رواں ہے
تپاں ہیں ،تپاں ہیں
یہ چکریونہی جاوداں چل رہا ہے
کنواں چل رہا ہے
کنواں چل رہا ہے مگرایک نغمۂ سرمدی (خواجہ فریدؒنے،انہدمرلی کہا ہے)مسلسل کانوں میں پڑ رہا ہے۔دل کی دھڑکنوںسے ہم آہنگ ہوتی ہوئی ایک لے اورکن فیکون کی دمادم آتی ہوئی آواز عدم سے لے کرازل تک اورازل سے ابدتک پھیلی ہوئی ہے۔عدم ،ازل اورابد کایہ کھیل روزانہ ہورہا ہے۔نہ وقت رکتاہے نہ گردش تھمتی ہے۔اس انتہائی آہستہ روی اور غیر محسوس طریقے سے بن تھکے،یہ پیہم رفتار،اپنے اندرنہ جانے کتنوں جہانوں کے راز چھپائے ہوئے ،ان دیکھی منزلوں کی طرف رواںدواں ہے۔یہ حرکت ہمیشہ سے تھی ہے، اور تاابدتک رہے گی ۔ کیوں کہ کنواں چل رہا ہے۔کائنات قائم ہے،دنیاکاچکر،چل رہا ہے۔ حیا ت وممات کا نظام قائم ہے ۔پانی زندگی کی علامت ہے،خالق اکبرکافرمان ہے۔ہم نے ہر چیزکوپانی سے پیداکیاہے۔ اس طرح' کنواں' زندگی کا مرکزومحوربن جاتاہے۔آپ نے دیکھایہ پوری نظم عجیب وحسین تراکیب اورمعنی کااک جہاں اپنے اندرلئے ہوئے ہے۔
اس نظم کاایک اورپہلوسے مطالعہ کرتے ہیں۔اس نظم میں چندعلا مات ہیں ۔
کنواں ،پانی ،کنویں کی نفیری ،بیل ،کنویں والا ،بنسی کی میٹھی سریلی صدا،فصلیں ، خوشبو،
دامِ ہوا،نظامِ فنااور نغمۂ سرمدی وغیرہ وغیرہ۔
کنواں ،کنویں کاچلنا،کائنات اورنظام کائنات سے متعلق ہے۔لیکن کنویں کے چلنے کے باوجودکھیتوں کا بنجرہونا،ایک اورطرف اشارہ کرتاہے۔برعظیم کی مملکت کئی تہذیبوں کا مرکز اور تمدنوں کا گھرہے۔ملک اب بھی موجودہے اگرچہ منقسم ہے۔لیکن لوگ خوش کیوں نہیں ہیں؟ حکمران موجودہیں،لیکن نظامِ حکومت کش مکش کا شکارکیوں ہے۔کھیتوں کا سوکھنااس جانب اشارہ کرتاہے۔کہ یاتوپانی نہیں چل رہا ،یاتوپانی زہرآلودہوچکاہے،یاخون آلود۔وہی پانی جوزندگی کا ضامن تھا،اب کناروں کوکھارہاہے۔جوزخموں کاعلاج کرنے والا نشترتھا،زخموں میں اضافہ کر رہاہے۔جب کہ کنویں کی نفیری سے یہ احساس ہوتاہے،سب ٹھیک ہے۔
کنواں حکمران (نظام)کی علامت کے طورپرظاہرہوتا۔اورپانی،نظامِ حکومت پرعمل درآمد کوظاہرکرتاہے۔نظامِ مملکت میں تہذیب وتمدن بنیادی حیثیت رکھتے ہیں۔ لہٰذاان کے بدلنے سے پانی خون رنگ ہوگیاہے۔اوروہ تہذیب وتمدن جوقوم کی جان اور پہچان تھے ۔اب زخم خوردہ ہیں ۔یقینا ان میں تبدیلی واقع ہوچکی ہے۔یہ پانی جڑوں کوکاٹ رہا ہے۔بنیادیں کھوکھلی ہو رہی ہیں ۔ اوریہ کام اس احتیاط سے ہورہا ہے۔کہ (اسرار) کسی پرظاہرنہیں ہوتا۔
عوام اس مجرم خاموشی کوسمجھنے سے قاصرہیں۔اورپراسرارگانے کوسن کرچلے جارہے ہیں۔بیل اندھے،تھکے ہارے ( بے خبرعوام)اپنی سادہ لوحی کے سبب ظلم وجبر کوبرداشت کرتے ہوئے آگے بڑھ رہے ہیں۔کہ شایداب منزل مل جائے ،لیکن نہ نشانِ منزل اورنہ منزل۔اور حالات انہیں ایسی نہج پر پہنچاچکے ہیں،کہ نہ پائے رفتن نہ جائے ماندن۔یوں ظالم پنجوں سے آتشیں تازیانے کھاتے ہوئے چلتے رہنے پرمجبورہیں۔
دوسری طرف کنوئیں والا اپنے آپ میں مست ہے۔نام نہادرہبربے خبرہے اور خود غرض خوا ہشات کا غلام بناہواہے۔اسے اس بات کی فکر نہیں کہ ملک کا کیا ہوگا۔قوم کس حال میں ہے۔لوگ کس طرح زندہ ہیں۔فاقہ مست لقمۂ اجل بن رہے ہیں یاکوئی پھول مسلا گیا ہے۔فضا کی آلودگی نے خوشبوکے غیرمرئی جسم کونگل لیاہے۔کثافتیں لطافتون ںپر(قابض) مسلط ہوچکی ہیں۔وہ اپنی بے سری بانسری کی آوازمیں خوش،گردونواح سے جان بوجھ کرآنکھیں اور کان بند کئے لیٹاہے۔وہ چندٹکوں میں بک کررقص وسرودمیں مست ہے۔آنگن دھول میں دھول ہوں یا امیدیں خاک ہوں،خوشبوئیں دامِ ہوامیں فنا ہوں یامعصوم عصمتیں لٹتی رہیں وہ بے حسی کے نشے میں گرفتارہے۔
اوراگرخوشبوسے مرادہندومسلم تہذیب یامسلم تہذیب ہوتو،دامِ ہوا،کثافتوں کی آلودگی مغربی تہذیب قرارپاتی ہے۔ایک گومگوکی حالت ہے۔مسلسل مقابلہ ہے۔ظلم پنجے گاڑھ رہا ہے اورمظلوم جدوجہدکی آخری کوشش کررہا ہے۔
مجیدامجدیہاں رک جاتاہے اورسوچ کومہمیزلگا کرپیچھے ہٹ جاتاہے،اب فیصلہ کرنا آپ کا کام ہے کہ اس کش مکش کا انجام کیاہوا۔لیکن آخری بندمیں نظامِ دنیا کا ذکرہے۔ دنیا آج تک عروج وزوال کے کتنے ادواردیکھ چکی ،ظالم ومظلوم کے قصے بھی دیکھے، معصومیت اورکراہت کی شکلیں بھی دیکھیں۔لیکن ایک نغمۂ سرمدی،دمادم آوازکن فیکون،مسلسل آرہی ہے۔اب یہاں کنواں آفاقی تناظرمیں نظامِ کائنات کی علامت بن رہا ہے۔کنواں چل رہا ہے،نظامِ کائنات چل رہا ہے۔نرم رورفتارعدم سے ازل تک،ازل سے ابدتک ایک لمحے کے لئے بھی اس کی گردش میں تعطل پیدا نہیں ہوتا۔جانے اپنے اندرکتنے رازچھپائے ،چشمِ فلک شہیدِکائنات ہونے کے باوجود رواں ہے۔اورکنواں،یوں پوری دنیاکا محورومرکزبن جاتاہے۔اگراس تناظرمیں دیکھیں تویہ نظم پہلی نظرمیں ایک قوم یاتہذیب کاحوالہ بنتی ہے۔ اوردوسری نظرمیں معاشرتی سطح سے بلندہوکر آفاقی تناظرمیں پوری کائنات کا حوالہ بن جاتی ہے۔
No comments:
Post a Comment